Տնտեսական զարգացման և ներդրումների նախարար Տիգրան Խաչատրյանը խորհրդարանում լրագրողների հետ զրույցում հայտարարեց, որ 2019-ին կլինի գնաճ, որը չի գերազանցելու 4%-ը։ ՀՀ ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վարազդատ Կարապետյանը կարծում է, որ մեզանում գնաճը զսպելու քաղաքականությունը չափից ավելի խիստ է․
«Մենք պետք է կարողանանք ավելի մեծ գնաճ ունենալ մեր երկրում, ենթադրենք՝ մինչև 10 տոկոս, որը ձեռնարկություններին հնարավորություն կտա ավելի լավ աշխատել, ապրանքային շուկաներից ձեռնարկությունների վրա ճնշում չի լինի։ Այլ հարց է, որ մենք զուգահեռ պետք է ունենանք աշխատավարձերի աճ»,-ասաց պատգամավորը։
Նա նաև նշեց, որ իրենք հիմա աշխատում են նվազագույն աշխատավարձի շեմը բարձրացնելու օրինագծի վրա․ «Մենք ամենակարևոր գործը, որ պետք է անենք աշխատավարձի բարձրացման ուղղությամբ, տնտեսության մրցունակության բարձրացման հարցն է։ Գիտելիք, մարդկային կարողությունների զարգացում և ստեղծարար աշխատանք, սրանք այն հիմնական ուղղություններն են, որոնց վրա պետք է աշխատենք, որպեսզի կարողանանք հասնել արտադրողականության և աշխատավարձերի աճին»,-հավելեց նա։
